Ichki ishlar vazirligi Malaka oshirish institutining Olmaliq shahridagi o‘quv bazasida Kasbiy tayyorgarlik fakulteti tinglovchilarining navbatdagi o‘quv kurslari bo‘lib o‘tmoqda. O‘quv bazasida tinglovchilar uchun barcha shart-sharoitlar yaratilgan.
Fakultetda «Yo‘l-patrul faoliyati», «Patrul-post xizmati faoliyati», «Pasport tizimini ta’minlash faoliyati», «Maxsus operatsiyalarni amalga oshirish faoliyati», «Jazoni ijro etish faoliyati» yo‘nalishlarida maxsus besh oylik dastur asosida belgilangan qabul kvotasi bo‘yicha kadrlar tayyorlanmoqda.
O‘quv mashg‘ulotlari vazirlik sohaviy xizmatlari bilan hamkorlikda ishlab chiqilgan o‘quv dasturlari asosida tashkil etildi. Nazariy va amaliy mashg‘ulotlar Ichki ishlar vazirligi Malaka oshirish instituti professor-o‘qituvchilari va sohaviy xizmatlarning tajribali amaliyot xodimlari tomonidan nafaqat an’anaviy usullarda, balki zamonaviy axborot kommunikatsiya texnologiyalarini qo‘llagan holda interfaol usullarni qo‘llagan holda davra suhbati, bahs, munozara, seminar-trening, amaliy mashg‘ulot shakllarida olib borilyapti.
O‘quv mashg‘ulotlarida davlatimiz rahbari tomonidan ilgari surilgan ichki ishlar organlari faoliyatiga oid dolzarb vazifalarga, ularning mazmun-mohiyatiga, sohaga oid qabul qilingan yangi normativ-huquqiy hujjatlarning talablari bilan tanishtirishga alohida e’tibor qaratilmoqda.
IIV Malaka oshirish instituti Matbuot xizmati
