Ichki ishlar vazirligi Malaka oshirish institutining kasbiy tayyorgarlik fakulteti “Maxsus operatsiyalarni amalga oshirish faoliyati” mutaxassisligi bo‘yicha  tahsil olayotgan tinglovchilarning qasamyod qabul qilish tantanali marosimi bo‘lib o‘tdi.

Tadbirda vazirlik mas’ullari, institut rahbariyati, xodimlari, faxriylar, keng jamoatchilik vakillari, ommaviy axborot vositalari tinglovchilarning ota-onalari va yaqinlari xodimlari ishtirok etdilar.

Tadbir boshida o‘zining shijoati va bilimi bilan namuna ko‘rsatgan tinglovchilar tomonidan saf maydoni bo‘ylab o‘zgacha g‘urur va chuqur mas’uliyat bilan baland ko‘tarilgan holda davlatimiz bayrog‘i vazirlik orkestri ijrosi ostida, tantanali ravishda olib o‘tildi hamda bir chiziqda roslanib saf tortgan tinglovchilar va boshqa ishtirokchilar tomonidan davlatimiz madhiyasi ijro etildi.

Tadbirni kirish so‘zi bilan ochib bergan institut boshlig‘i, polkovnik Olimjon Axmedov o‘z nutqida tizimdagi keng ko‘lamli islohotlar natijasida professional asosdagi ichki ishlar organlari shakllangani, xodimlar xalqimizning tinchligi va osoyishtaligini ta’minlash yo‘lida mas’uliyat bilan xizmat olib borayotganliklarini alohida ta’kidlab o‘tdi.

Qasamyod qabul qilgan tinglovchilarga kelgusi sharafli xizmat faoliyatlarida muvaffaqiyatlar tilandi.

Institut Matbuot xizmati