9-may – Xotira va qadrlash kuni munosabati bilan 574- hamda 575-sonli maktabgacha ta'lim tashkilotlarida tantanali tadbir tashkil etildi. Tadbirda Ichki ishlar vazirligi Malaka oshirish instituti professor o‘qituvchilari, maktabgacha yoshdagi bolalar hamda ularning ota-onalari faol ishtirok etdi.
Tadbir davomida bolajonlar Vatanga muhabbat, jasorat va tinchlikni ulug‘lovchi she’r va sahna ko‘rinishlari bilan ishtirokchilar qalbida chuqur taassurot qoldirishdi. Harbiy libosdagi chiqishlar, milliy raqslar va ifodali nutqlar orqali yosh avlodning yuksak vatanparvarlik ruhini ifodalashga intilganlari barchaga manzur bo‘ldi.
Institut xodimlari o‘z hayotiy tajribalari bilan o‘rtoqlashib, yosh avlodni Vatanga sadoqatli, jasoratli va hurmatli insonlar bo‘lib ulg‘ayishlariga da’vat etdilar.
Tadbir yakunida mehmonlarga esdalik sovg‘alari topshirildi. Bu kabi uchrashuvlar yosh avlod qalbida ajdodlar xotirasini qadrlash, milliy g‘urur va vatanparvarlik tuyg‘ularini mustahkamlashda muhim ahamiyat kasb etadi.
Maftuna Uzoqova,
O‘zDJTU talabasi,
IIV Malaka oshirish instituti Matbuot
xizmati amaliyotchisi
