Ichki ishlar vazirligi Malaka oshirish institutida navbatdagi bir haftalik oʻquv kurslari yakuniga yetdi.
Unda tahsil olgan kriminogen vaziyati ogʻir mahallalarda tashkil etilgan yangi huquq tartibot maskanlarining 84 nafar Bosh inspektorlariga diplom va xizmatda foydalanish uchun “Damas“ avtomashinalarini tantanali tarzda topshirish marosimi boʻlib oʻtdi.
Tadbirda ishtirok etgan Ichki ishlar vaziri oʻrinbosari hamda Malaka oshirish instituti rahbariyati tomonidan taʼkidlanganidek, mashgʻulotlarda huquqbuzarliklar profilaktikasi, jamoat tartibini saqlash, yoʻl harakati xavfsizligi va probatsiya yoʻnalishlari boʻyicha bosh inspektorlarning bilim va koʻnikmalari oshirilib, ularning xizmat faoliyatida belgilab berilgan bosh mezon chuqur tushuntirildi.
Bosh inspektorlarga diplom va avtomobillar tantanali tarzda topshirilib, kelgusi faoliyatlarda ulkan ishonch bildirildi.
Taʼkidlash joizki, Oʻzbekiston Respublikasi Prezidentining 2025-yil 3-yanvardagi 1-sonli qarori bilan aynan mahallada jinoyatlarni jilovlashga barcha vazirlik va idoralar ichki ishlar organlariga koʻmakchi sifatida biriktirildi.
Shuningdek, ushbu qarorga asosan Andijon, Fargʻona, Namangan, Samarqand va Toshkent viloyatlarining kriminogen vaziyati ogʻir 419 ta mahallalarida 84 ta yangicha namunadagi mahalla huquq-tartibot maskanlarining faoliyatini yoʻlga qoʻyish belgilandi.
Taqdim etilayotgan mazkur avtotransport vositalari esa yangi huquq tartibot maskanlarida sohaning moddiy-texnik bazasini yanada mustahkamlash va xizmat sifatini yaxshilashda oʻz hissasini qoʻshadi.
