IIV huzuridagi Jazoni ijro etish departamentining yangi maʼmuriy binosi foydalanishga topshirildi
Tinchlikni taʼminlash fuqarolar xavfsizligini ishonchli himoya qilish Ichki ishlar organlari xodimlari zimmasidagi ulkan masʼuliyat. Sharafli burchni ado qilayotgan har bir xodim bugungi kunidan mamnun, ertangi kuniga ishonchi mustahkamdir. Davlatimiz rahbari tashabbusi bilan bugun Ichki ishlar organlari faoliyati tubdan takomillashdi, sohaga yangi innovatsion texnologiyalar joriy etilishi, yangi maʼmuriy binolarning qurilishi xodimlar uchun yaratilgan imkoniyatlar faqat va faqat yaxshi mehnat muhitini yaratishga qaratilgan. Ichki ishlar vazirligi huzuridagi Jazoni ijro etish Departamenti uchun yaqinda qurib foydalanishga topshirilgan yangi va zamonaviy binoni ham ana shu islohotlardan biri deyish mumkin.
Toshkent viloyati Zangiota tumanining Bogʻzor qoʻrgʻonida joylashgan mazkur binoda xodimlar uchun barcha sharoitlarga ega boʻlgan keng va shinam xizmat xonalari, muhtasham maʼnaviyat va maʼrifat zali hamda videoselektor xonasi barpo etilgan. Xodimlar sport bilan muntazam shugʻullanib, jismoniy tayyorgarliklarini oshirib borishlari uchun ham barcha imkoniyatlar mujassam. Jumladan yozgi va qishki mavsumga moʻljallangan sport maydonlari barcha zarur jihozlar bilan taʼminlangan.
Tantanali ochilish marosimiga Ichki ishlar vaziri general-leytenant Poʻlat Razzoqovich Bobojonov boshchiligida vazirlik sohaviy xizmatlari rahbarlari, Ichki ishlar organlari faxriylari va boshqa mehmonlar tashrif buyurdi. Tadbirda Ichki ishlar vaziri soʻzga chiqib, bu kabi islohotlar zamirida inson qadri ulugʻlanishi, xodimlarning ish unumdorligini oshirish ularga zarur sharoitlarni yaratib berish har doim muhim vazifalardan biri ekanini taʼkidlab oʻtdi.
Marosim davomida mazkur binoni barpo etilishida jonbozlik koʻrsatgan quruvchi ustalar, fidoiy xodimlarga esdalik sovgʻalari topshirildi. Shundan soʻng vazirlik rahbariyati va faxriylar ishtirokida “lenta” kesilib, mehmonlar binoda yaratilgan shart-sharoitlar bilan yaqindan tanishdilar.
Tadbir soʻnggida barcha mehmonlar bayram dasturxoniga taklif etildi. Bir piyola choy ustida faxriy ustozlar oʻzlarining hayot yoʻllari haqida soʻzlab berishdi. Vazirlik Qoʻshiq va raqs ansambli xonandalari tomonidan ijro etilgan dilrabo kuy va qoʻshiqlar esa barchaga bayramona kayfiyat ulashdi.
