Xodimlarning eslab qolish qobiliyatini yanada shakllantirish” mavzusida davra suhbati boʻlib oʻtdi
Ichki ishlar vazirligi Malaka oshirish institutida vazirlik farmoyishiga asosan oʻtkazilayotgan “Jismoniy va jangovar tayyorgarlik oyligi” doirasida Oʻzbekiston Mnemosport federatsiyasi rahbari Davronbek Turdiyev va uning jamoasi bilan “Xodimlarning eslab qolish qobiliyatini yanada shakllantirish” mavzusida davra suhbati boʻlib oʻtdi.
Davra suhbatida eslab qolish sanʼati, unga erishish uchun nima qilish kerakligi, nima uchun insonlar oʻrtasida xotira sustligi juda koʻp uchrayotganligi, ular birovlarga xotirasi yomonligidan shikoyat qilishi, aslida esa, ularda xotira emas, balki kuzatuvchanlik yomonroq boʻlishi toʻgʻrisida tushunchalar berildi. Yuksak xotiraga ega boʻlish uddalab boʻlmas ish emasligi, aslida u juda oson: kuzatuvchanlik, diqqatni jamlashni oʻrganish, sanalarni yodda saqlab qolish uchun suratlar bilan bogʻlanish, ismni esda saqlash uchun uning maʼnosini bilish, qanday yozilishiga eʼtibor berish, darsliklarni qayta-qayta takrorlash orqali esda qoldirish kabi yoʻllardan iborat ekanligi aytib oʻtildi.
Tadbirda mutaxassislar tomonidan miya rivojlanishi insonga juda koʻp ijobiy taʼsir koʻrsatishi va hayot sifatini yaxshilashga va maqsadlarga erishishga yordam berishi toʻgʻrisida maʼlumotlar berildi.
Shuningdek, mutaxassislar tomonidan miyani rivojlantirish uchun mashqlar koʻrsatilib, kerakli tavsiyalar berildi.
IIV Malaka oshirish instituti Matbuot xizmati
