Mamlakatimizda Yangi O‘zbekistonni barpo etish barobarida amalga oshirilayotgan keng ko‘lamli islohotlar, yangilanishlar samarasi o‘laroq, ichki ishlar organlarida ham tizimli ishlar qilinmoqda. Bugungi kunda jamiyatda xotin-qizlarni tazyiq va zo‘ravonlikdan himoya qilish maqsadida amaldagi qonun hujjatlari yana-da takomillashtirilib borilmoqda.
Jumladan, O‘zbekiston Respublikasi Vazirlar Mahkamasining 2023 yil 19 yanvardagi “Ichki ishlar organlarining xotin-qizlar masalalari bo‘yicha bo‘linmalari huzuridagi “To‘maris izdoshlari” jamoaviy guruhlari faoliyatini tashkil etish chora-tadbirlari to‘g‘risida”gi qarori talablaridan kelib chiqib, Ichki ishlar organlarining Huquqbuzarliklar profilaktikasi xizmatida bir qancha yangi tartiblar joriy qilindi.
Ichki ishlar vazirligi Malaka oshirish institutida “podpolkovnik” maxsus unvonini berish uchun maxsus malaka oshirish kursiga kelgan tinglovchilar bilan mazkur qarorning mazmun-mohiyati institut Maxsus kasbiy fanlar kafedrasi katta o‘qituvchisi, podpolkovnik Zuhra Aliyeva tomonidan o‘quv mashg‘uloti davomida keng yoritildi.
Mashg‘ulot davomida O‘zbekiston Respublikasi Prezidentining 2021 yil 29 noyabrdagi «O‘zbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlari to‘g‘risida» Farmoniga muvofiq, 2023 yil 1 iyundan boshlab ichki ishlar organlari xotin-qizlar masalalari bo‘yicha bo‘linmalari huzurida yoshlar orasidan yoshi o‘n sakkizdan kichik va o‘ttizdan katta bo‘lmagan, umumiy o‘rta yoki o‘rta maxsus maʼlumotli, biriktirilgan hududda doimiy yashovchi hamda muloqotga kirishuvchan va tashkilotchilik qobiliyatiga ega xotin-qizlarni ko‘ngilli asosda jalb qilish orqali «To‘maris izdoshlari» jamoaviy guruhlarini tashkil etilishi yo‘lga qo‘yilganligi hamda ushbu guruh aʼzolariga O‘zbekiston Respublikasi Ichki ishlar vazirligi Akademiyasi hamda O‘zbekiston Respublikasi Milliy gvardiyasi tizimidagi Jamoat xavfsizligi universitetiga o‘qishga kirishda imtiyozlar berish tartiblari ham tushuntirib o‘tildi.
Mashg‘ulot yakunida tinglovchilar o‘zlarini qiziqtirgan savollariga javoblar olishdi.
IIV Malaka oshirish instituti Matbuot xizmati
