O‘zbekiston Respublikasi Ichki ishlar vazirligi Malaka oshirish instituti rahbariyati va mutaxassis xodimlari 2024 yil 22 may kuni O‘zbekiston Respublikasi Prezidenti huzuridagi Davlat boshqaruvi akademiyasida tashkil etilgan “Davlat boshqaruvida sun’iy intellekt istiqbollari: Koreya tajribasi” mavzusida хalqaro davra suhbatida ishtirok etdilar.
Shuningdek, davra suhbatida Koreya Respublikasi Inson resurslarini rivojlantirish milliy instituti rahbariyati va xodimlari, O‘zbekiston Respublikasi Prezidenti huzuridagi Davlat xizmatini rivojlantirish agentligi, O‘zbekiston Respublikasi Raqamli texnologiyalar va Adliya vazirliklari, Toshkent shahridagi Inxa universtiteti, Ichki ishlar vazirligi Malaka oshirish instituti rahbariyati va mutaxassis xodimlari va boshqalar ishtirok etishdi.
Tadbirni O‘zbekiston Respublikasi Prezidenti huzuridagi Davlat boshqaruvi akademiyasi rektori Bekmurodov Adxam Sharipovich hamda Koreya Respublikasi Inson resurslarini rivojlantirish milliy instituti prezidenti Kim Che Xvan janoblari kirish so‘zi bilan ochib berdilar.
Tadbir qizg‘in bahs-munozaralarga boy tarzda o‘tdi. Unda Koreya davlat xizmatchilarini raqamlashtirishda sun’iy intellektning o‘rni va undan foydalanish masalalari, sun’iy intellekt texnologiyasining ijobiy va salbiy jihatlari, ushbu texnologiyalarni rivojlantirish va joriy etishning asosiy yo‘nalishlari muhokama qilindi.
Tadbir yakunida tomonlar mazkur yo‘nalishda hamkorlikni davom ettirish va takomillashtirish borasida kelishib oldilar.
IIV Malaka oshirish instituti Xalqaro guruhi
