Ички ишлар вазирлиги Малака ошириш институтида навбатдаги бир ҳафталик ўқув курслари якунига етди.
Унда таҳсил олган криминоген вазияти оғир маҳаллаларда ташкил этилган янги ҳуқуқ тартибот масканларининг 84 нафар Бош инспекторларига диплом ва хизматда фойдаланиш учун “Дамас“ автомашиналарини тантанали тарзда топшириш маросими бўлиб ўтди.
Тадбирда иштирок этган Ички ишлар вазири ўринбосари ҳамда Малака ошириш институти раҳбарияти томонидан таъкидланганидек, машғулотларда ҳуқуқбузарликлар профилактикаси, жамоат тартибини сақлаш, йўл ҳаракати хавфсизлиги ва пробация йўналишлари бўйича бош инспекторларнинг билим ва кўникмалари оширилиб, уларнинг хизмат фаолиятида белгилаб берилган бош мезон чуқур тушунтирилди.
Бош инспекторларга диплом ва автомобиллар тантанали тарзда топширилиб, келгуси фаолиятларда улкан ишонч билдирилди.
Таъкидлаш жоизки, Ўзбекистон Республикаси Президентининг 2025 йил 3 январдаги 1-сонли қарори билан айнан маҳаллада жиноятларни жиловлашга барча вазирлик ва идоралар ички ишлар органларига кўмакчи сифатида бириктирилди.
Шунингдек, ушбу қарорга асосан Андижон, Фарғона, Наманган, Самарқанд ва Тошкент вилоятларининг криминоген вазияти оғир 419 та маҳаллаларида 84 та янгича намунадаги маҳалла ҳуқуқ-тартибот масканларининг фаолиятини йўлга қўйиш белгиланди.
Тақдим этилаётган мазкур автотранспорт воситалари эса янги ҳуқуқ тартибот масканларида соҳанинг моддий-техник базасини янада мустаҳкамлаш ва хизмат сифатини яхшилашда ўз ҳиссасини қўшади.
