Ички ишлар органларининг ходимларини бошланғич, касбий ва қайта тайёрлаш ҳамда уларнинг малакасини ошириш Институтнинг асосий мақсади ҳисобланади.

Қуйидагилар Институтнинг асосий вазифалари ҳисобланади:

ички ишлар органлари тизимида узлуксиз ўқув-карьера жараёнини тизимли равишда амалга оширилишини таъминлаш;

ички ишлар органлари учун етук касбий тайёргарликка, зарур билим ва кўникмаларга эга бўлган, юқори малакали мутахассис кадрларни касбий тайёрлаш;

ички ишлар органлари ходимларининг узлуксиз таълим тизимида самарали бошланғич ва қайта тайёргарликдан ўтишини таъминлаш;

ички ишлар органлари ходимларининг интеллектуал ва профессионал салоҳиятини ошириш учун малака ошириш курсларини, шу жумладан уларнинг хизматдан ажралмаган ҳолда бевосита жойларда малакасини оширишни таъминлаш мақсадида масофавий ва мобиль сайёр курсларни ўтказиш;

ходимларни қабул қилинаётган янги қонунлар ва амалдаги қонун ҳужжатларига киритилган охирги ўзгартириш ва қўшимчалар мазмун-моҳияти, давлат ва жамият ҳаётини модернизациялаш, суд-ҳуқуқ соҳасини янада демократлаштириш жараёнлари, ҳуқуқни муҳофаза қилиш органлари, шу жумладан ички ишлар органлари фаолиятида ҳуқуқни қўллашнинг замонавий талаблари ҳамда ушбу соҳадаги хорижий давлатлар тажрибаси билан яқиндан таништириш, ходимларнинг касбий маҳорат ва кўникмаларини шакллантириш;

ўқув, ўқув-методик, илмий-тадқиқот ишларини ташкил этиш ҳамда амалга ошириш учун республиканинг етакчи таълим, илмий-тадқиқот муассасалари, давлат органлари ва жамоат ташкилотлари, Ички ишлар вазирлигининг соҳавий хизматлари, шунингдек, халқаро ташкилотлар ва хорижий мамлакатларнинг етакчи таълим ва илмий муассасаларининг тажрибали олимлари, мутахассислари ва экспертларини жалб этиш, шу жумладан шартнома асосида жалб этиш, бошқа таълим муассасалари ва ташкилотларда малакасини оширишни ташкил этиш;

мамлакатимиздаги ва хориждаги етакчи турдош таълим муассасалари билан кадрларни қайта тайёрлаш ва малакасини ошириш бўйича тажриба алмашиш, ҳамкорликда ўқув дастурларини жорий этиш ҳамда профессор-ўқитувчиларнинг мазкур таълим муассасаларида малакасини ошириш ва стажировкадан ўтказиш орқали халқаро ҳамкорликни ривожлантириш.

Институт ўзига юклатилган вазифаларга мувофиқ қуйидаги функцияларни амалга оширади:

ўқитишнинг замонавий шакл ва усулларини, энг янги педагогик ва ахборот-коммуникация технологияларини, шу жумладан ситуацион машғулотларни, масофадан ўқитиш тизимини кенг жорий этиш, таълим олувчилар ва ўқитувчиларга глобал ахборот-ҳуқуқий ва таълим ресурсларидан фойдаланиш имкониятларини таъминлаш;

ички ишлар органлари фаолиятида мавжуд муаммолар, шу жумладан жамоат тартибини сақлаш, ҳуқуқбузарликлар профилактикаси, жиноятчиликка қарши кураш соҳасидаги таҳлилий ишларни, мавжуд муаммоларни тизимли таҳлил қилиш ва криминоген вазиятни прогнозлашга оид илмий тадқиқотлар ўтказиш;

ички ишлар органлари фаолиятини самарадорлигини ошириш, шунингдек қонунчилик ва ҳуқуқни қўллаш амалиётини такомиллаштиришга қаратилган илмий асосланган таклифларни ишлаб чиқиш ва жорий этиш;

Институтнинг Ўзбекистон Республикаси Ички ишлар вазирлиги академик лицейларидаги филиаллари (аудиториялари)да ўқув-услубий жараёнларни мувофиқлаштириш ва уларга раҳбарлик қилиш;

ички ишлар органлари шахсий таркиби ва фуқаролар ўртасида ижтимоий, маънавий-маърифий ҳамда ҳуқуқий тарғибот тадбирларини ўтказиш;

ички ишлар органлари ходимларини қайта тайёрлаш ва уларнинг малакасини ошириш масалалари юзасидан республикамиздаги етакчи турдош таълим муассасалари, халқаро ташкилотлар ҳамда хорижий давлатлар таълим муассасалари билан ўзаро ҳамкорликни амалга ошириш;

Институтда бошқа соҳа мутахассисларининг ҳуқуқий билимларини ошириш бўйича қисқа муддатли ўқув курсларини, шу жумладан шартнома асосида ташкил этиш;

Институт моддий-техник базасини замонавий талаблар асосида жиҳозлаш ва доимий равишда такомиллаштириб бориш.

Институт қонун ҳужжатларига мувофиқ бошқа вазифа ва функцияларни ҳам амалга ошириши мумкин.

Қуйидагилар Институт фаолиятининг асосий йўналишлари ҳисобланади:

ички ишлар органлари соҳавий хизматларининг барча йўналишлари бўйича сержантлар таркиби ходимларини жамоат хавфсизлигини таъминлаш фаолиятини ташкил этиш соҳасида махсус касбий тайёрлаш;

ички ишлар органларининг сафдор ва офицерлар таркибидаги лавозимларига биринчи марта тайинланган ходимларни бошланғич касбий тайёргарлик бўйича ўқув дастурлари асосида ўқитиш;

ички ишлар органларининг барча тоифадаги ходимларини инновацион ахборот ва педагогик технологияларни қўллаган ҳолда, шу жумладан турдош йўналишдаги республика олий таълим муассасалари базасида қайта тайёрлаш ва малакасини оширишни ташкил этиш;

ходимларга махсус унвонлар берилиши ҳамда лавозимларга тайинланиши учун уларни қайта тайёрлаш ва малака ошириш курсларидан ўтишларини таъминлаш;

ички ишлар органлари ходимларини қайта тайёрлаш ва малака оширишга бўлган эҳтиёжини ўрганиш, уларнинг малакасини ошириш сифатини доимий назорат ва мониторингини олиб бориш.