Ички ишлар органлари ходимлари бошқа турдаги касбий фаолият билан боғлиқ лавозимга тайинланганда ёки уларни янги йўналишлар бўйича тайёрлаш зарур бўлганида, шунингдек , сафдор ва сержантлар таркибидаги ходимларни офицерлик лавозимларига тайинланишидан олдин қайта тайёргарликдан ўтиши шарт.

Агар ходим илгари шу мутахассислик лавозими бўйича ишлаган ва бошқа мутахассислик лавозимига тайинланиб хизматни давом эттираётганлигига уч йил тўлмаган тақдирда мутахассислик бўйича қайта тайёрлаш курсидан ўтиши мажбурий эмас.

Ички ишлар органларининг сафдорлар таркиби лавозимларида хизмат ўтаётган ходимларни (фуқаровий олий маълумотга эга бўлганда) офицерлик лавозимларига тайинлаш учун Малака ошириш институти базасида (ўқув полигонида) муддати бир ойгача бўлган кундузги қайта тайёрлаш курсларда ўқитилади.

Ички ишлар органларининг сержантлар таркиби лавозимларида хизмат ўтаётган ходимларни (фуқаровий олий маълумотга эга бўлганда) офицерлик лавозимларига тайинлаш учун Малака ошириш институти базасида (ўқув полигонида) ҳамда Махсус тайёргарлик ўқув марказида муддати бир ойгача бўлган кундузги қайта тайёрлаш курсларда ўқитилади.

Ички ишлар органларининг офицерлар таркиби лавозимларида хизмат қилаётган ходимларни Ўзбекистон Республикаси Ички ишлар вазирлиги Академиясида (кейинги ўринларда – ИИВ Академияси) ўқитилиши белгиланган бошқа мутахассислик лавозимларига тайинлаш учун муддати уч ҳафтагача бўлган кундузги қайта тайёрлаш курсларда Малака ошириш институти базасида (ўқув полигонида) ва унинг филиалларида сайёр курсларда хизматдан ажралган ҳолда ўқитилади.

Айрим офицерлик лавозимларига тайинлаш учун ихтисослашган қайта тайёргарлик талаб қилинганда, ходимларни турдош йўналишдаги республика олий таълим муассасалари базасида қайта тайёрлашни ташкил этиш мумкин.

Қайта тайёрлаш курси тингловчиси курс якунида якуний аттестациядан ўтиши керак, бунда аттестация жараёнида тингловчи томонидан битирув иши ҳимоя қилиниши ёки якуний имтиҳондан ўтказилиши мумкин.

Якуний аттестациядан муваффақиятли ўта олмаган тингловчи ўз хизмат жойида мустақил равишда ўқув дастурини қайта ўзлаштирганидан кейин бир ой ичида якуний аттестацияни қайта топширишига рухсат этилади.

Қайта тайёрлаш курсини узрли сабабларга кўра тугата олмаган тингловчиларга навбатдаги ташкил этиладиган курсларда қатнашишига рухсат берилади.

Қайта тайёргарлик курсларини муваффақиятли тугатганлиги тўғрисидаги сертификат ходимларни қайта тайёрлашга юборилган офицерлик лавозимларига тайинлаш, шунингдек, офицерлик махсус унвонига эга бўлмаганларга биринчи “лейтенант” махсус унвонини бериш учун асос бўлиб ҳисобланади.

Қайта тайёрлаш бўйича бериладиган сертификат фақат муайян лавозимда фаолият кўрсатиш ҳуқуқини беради ва ходимларни бошқа мутахассислик талаб этиладиган лавозимларга тайинлаш тақиқланади.

Ички ишлар вазирлиги таълим муассасаларининг илмий-педагог ходимларини педагогик қайта тайёрлаш қонунчилик ҳужжатларида белгиланган тартибда бошқа шаклларда ҳам амалга оширилиши мумкин.

Тошкент давлат юридик университетининг Ихтисослаштирилган филиалига қайта тайёрлаш дастури бўйича ўқишга Ички ишлар вазирининг тавсияси асосида олий ноюридик маълумотга эга бўлган амалдаги ходимлар белгиланган тартибда эгаллаб турган лавозими ва пул таъминоти сақлаб қолинган ҳолда қабул қилинади.