Малака ошириш институтининг касбий тайёргарлик факультетида (кейинги ўринларда - касбий тайёргарлик факультети) беш ойлик дастур бўйича ички ишлар органларининг сержант таркибидаги лавозимларига номзодларни махсус касбий тайёрлаш амалга оширилади.

Касбий тайёргарлик факультетига қабул ички ишлар вазири томонидан белгиланадиган 200 нафаргача бўлган квоталар доирасида танлов асосида амалга оширилади ҳамда таълим олувчиларга ўрнатилган тартибда моддий таъминот белгиланади;

Касбий тайёргарлик факультетига қабул қилиш тартиби Ўзбекистон Республикаси ички ишлар вазири томонидан тасдиқланади.

Касбий тайёргарлик факультетининг мақсади, вазифалари ва функциялари, фаолиятининг асосий йўналишлари, ҳуқуқлари ва мажбуриятлари, факультет фаолиятини ташкил этиш тартиби факультет низомида белгиланади.

Касбий тайёргарлик факультетида мутахассислар ўрнатилган тартибда тасдиқланган таълим мутахассисликлари рўйхати асосида тайёрланади.

Сержантлар таркибини махсус касбий тайёрлаш жараёни уларнинг бошланғич тайёргарликдан ўтишини ҳам қамраб олади.

Касбий тайёргарлик факультетини тамомлаган ходимларга “кичик сержант” махсус унвони ҳамда белгиланган намунадаги диплом берилади.

Касбий тайёргарлик факультетини тамомлаган ходимлар жисмоний куч ишлатиш, махсус воситалар ва ўқотар қуролни қўллаш ҳамда мустақил равишда хизмат фаолиятини олиб бориш ҳуқуқига эга бўлади ва кейинги хизматини давом эттириш учун ўрнатилган тартибда ички ишлар органларига юборилади.

Махсус касбий тайёрлаш курси давомида ўқишдан четлаштирилган, шунингдек, тегишли дипломни олмаган тингловчилар ўқишга киришдан олдин ички ишлар органларининг ходимлари ва ҳарбий хизматчилари сирасидан бўлганлар ўз хизмат ўташ жойига қайтариб юборилади.

Фуқаролар орасидан қабул қилинган тингловчиларнинг Махсус касбий тайёрлаш курси давомида ўқишдан четлаштириш тартиби Ўзбекистон Республикаси Ички ишлар вазирлиги таълим муассасалари курсант ва тингловчиларининг ўқишини кўчириш, қайта тиклаш ва ўқишдан четлаштириш тартиби тўғрисидаги низомига мувофиқ амалга оширилади.