Бошланғич касбий тайёргарлик – ички ишлар органларидаги хизматга биринчи марта қабул қилинган ходимларда ўз хизмат вазифаларини бажариш учун зарур билим ва кўникмаларни шакллантириш ҳамда уларнинг махсус тайёргарликка эга бўлишини таъминлаш бўйича ўқув тайёргарлигини амалга оширишдан иборат.

Бошланғич касбий тайёргарлик Ўзбекистон Республикаси Ички ишлар вазирлиги Малака ошириш институти (кейинги ўринларда Малака ошириш институти деб юритилади) томонидан қуйидаги тартибда ўтказилади:

ички ишлар органларининг сафдорлар таркиби лавозимларига биринчи марта тайинланган ходимлар билан муддати уч ойгача бўлган кундузги ва сайёр курсларда;

ички ишлар органларининг офицерлик лавозимларига биринчи марта тайинланган ходимлар (фуқаровий олий маълумотга эга бўлганда) билан муддати 3 ойгача бўлган кундузги ва сайёр курсларда.

Кундузги ўқитиш шаклидаги курсларда ходимлар Малака ошириш институти базасида (ўқув полигонида), сайёр курсларда институтнинг филиалларида бошланғич касбий тайёргарликдан хизматдан ажралган ҳолда ўтадилар.

Бошланғич касбий тайёргарлик сайёр курсида ўқиш учун фақатгина аёл ходималар ва Ички ишлар вазирлиги томонидан белгиланадиган айрим лавозимлардаги ходимларга рухсат берилади.

Бошланғич касбий тайёргарликдан ўтмаган ходимларни бошқа лавозимга ўтказиш, шунингдек хизмат фаолиятида махсус воситалар ва ўқотар қурол қўллаш билан боғлиқ шароитларда ҳаракатланиши ва фойдаланиши тақиқланади.

Ички ишлар органларига хизматга қабул қилинган кундан бошлаб, бир ойдан кечиктирилмаган муддатда ходимлар бошланғич касбий тайёргарликдан ўтказиш учун юборилиши шарт.

Бошланғич касбий тайёргарлик курсларига узрли сабабларга кўра (касаллиги, яқин қариндошларининг вафот этганлиги ва шу каби бошқа фавқулодда ҳолатлар) ўз вақтида кела олмаган ёки курс давомида узрли сабабларга кўра ўқишни тўлиқ якунлашга имкони бўлмаган ходимларнинг ўқиш муддати бошқа муддатга кўчирилади, улар ўз хизмат фаолиятини тўлиқ тиклаганидан кейин навбатдаги курсларда ўқишга рухсат берилади.

Бунда ходим томонидан узрли ҳолат юз берганлигини тасдиқловчи ҳужжат ва курсларда ўқиш учун юборган ички ишлар органи раҳбарининг маълумотномаси тақдим этилиши керак.

Бошланғич касбий тайёргарлик курсини муваффақиятли тугатганлиги тўғрисидаги сертификатни олган ходимлар жисмоний куч ишлатиш, махсус воситалар ва ўқотар қуролни қўллаш ҳамда мустақил равишда хизмат фаолиятини олиб бориш ҳуқуқига эга бўлади ҳамда кейинги хизматини давом эттириш учун ўрнатилган тартибда ички ишлар органларига юборилади.

Бошланғич касбий тайёргарлик курси давомида ўқишдан четлаштирилган (узрли сабабларга кўра четлаштирилганлар бундан мустасно), шунингдек, тегишли сертификатни олмаган тингловчиларнинг Ўзбекистон Республикаси Президентининг 2017 йил 29 ноябрдаги ПҚ-3413-сон қарори билан тасдиқланган Ички ишлар органларида хизматни ўташ тартиби тўғрисидаги низом талабларига асосан ички ишлар органларида хизматда қолиш ёки қолмаслик масаласи вазирликнинг таркибий тузилмалари ва ҳудудий бўлинмаларидаги навбатдан ташқари аттестация комиссиялари томонидан кўриб чиқилади.